کراچی (نیوز ڈیسک )آرمی چیف جنرل قمر جاوید باجوہ کرکٹ کے ساتھ خصوصی لگاؤ رکھتے ہیں جس کا اظہار انہوں نے وزیراعظم عمران خان کی حلف برداری کی تقریب میں شرکت کیلئے آئے بھارتی سیاستدان اور سابق کرکٹر نوجوت سنگھ سدھو کے ساتھ بھی کیا اور ان نے کے ساتھ جھپی بھی ڈالی تھی ۔ جنرل قمر جاوید باجوہ کو کرکٹ کے کئی ریکارڈ ز اور
واقعات زبانی یاد ہیںاور کرکٹ سے والہانہ محبت کا اندازہ اس بات سے لگایا جاسکتا ہے کہ وہ نجی دورے پر بدھ کو کیپ ٹاون میں تھے اور کرکٹ کی محبت انہیں نیولینڈز کیپ ٹاون کھینچ لائی جہاں انہوں نے ڈریسنگ روم میں پاکستانی کھلاڑیوں سے ملاقات کی ، جنرل قمر جاوید باجوہ کو اچانک دیکھ کر کرکٹرز کو خوشگوار حیرت ہوئی۔پاکستانی کھلاڑیوں کا کہنا ہے کہ جب منیجر طلعت علی جنرل قمر باجوہ سے ہر کھلاڑی کا تعارف کرارہے تھے تووہ اس کھلاڑی کے بارے میں پہلے ہی بہت سی معلومات رکھتے تھے۔ پاکستان ٹیم کے اسسٹنٹ منیجر اور سابق انٹر نیشنل کھلاڑی منصور رانا سے بات چیت کے دوران جنرل قمر باجوہ نے ان کے والد اور مشہور امپائر شکور رانا مرحوم کے بارے میں بہت ساری باتیں کیں اور منصور رانا کو اس وقت حیرت ہوئی جب وہ کہہ رہے تھے کہ آپ کے چچا سلطان رانا اچھے کرکٹر اور غیر معمولی فیلڈر تھے۔ ذرائع کا کہنا ہے کہ ڈیڑ ھ سال قبل جب پاکستانی ٹیم نے آئی سی سی چمپئن ٹرافی میں تاریخی کامیابی حاصل کی تھی تو آرمی چیف نے پاکستانی ٹیم کو جی ایچ کیو میں مدعو کیا تھا اس وقت کپتان سرفراز احمد اور دیگر کھلاڑیوں سے کھل کر
تبادلہ خیال کیا تھا۔ پاکستان کرکٹ ٹیم کے منیجر طلعت علی ملک نے بتایا کہ جنرل باجوہ وی آئی پی باکس میں میچ دیکھ رہے ہیں میں نے ان سے جاکر ملاقات کی اور انہیں مدعو کیا کہ آپ ڈریسنگ روم آکر کھلاڑیوں کی حوصلہ افزائی کریں۔ انہوں نے کہا کہ جنرل صاحب کرکٹ سے دیرینہ محبت رکھتے ہیں انہوں نے ہماری دعوت کو قبول کیااور کھلاڑیوں سے ملاقات کی وہ کھلاڑیوں سے گھل مل گئے۔ طلعت علی ملک نے کہا کہ جنرل باجوہ نے بتایا کہ وہ خود بھی اچھے کرکٹر رہے ہیں اور کرکٹ کے اب بھی شوقین ہیں۔ انہوں نے کھلاڑیوں سے کئی معاملات پر بات چیت کی اور کھلاڑی ان کی معلومات دیکھ کر حیرت زدہ رہ گئے۔
