لاہور(ویب ڈیسک) پی ایس ایل فورکے ڈرافٹ میں 44سالہ مصباح الحق منتخب ہوگئے جب کہ کئی نوجوان کرکٹرز صرف منہ دیکھتے رہ گئے۔اسلام آباد میں ہونے والے پی ایس ایل فور ڈرافٹ میں تمام فرنچائز ٹیموں نے اپنے 16رکنی اسکواڈز مکمل کرتے ہوئے سپلیمنٹری کھلاڑی بھی منتخب کرلیے،موجودہ پی ایس ایل چیمپئن اسلام آباد یونائیٹڈ کا مینٹور بننے کے
بجائے بطور پلیئر کھیلنے کے لیے بے تاب مصباح الحق کو حیران کن طور پر پشاور زلمی نے اپنی ٹیم میں شامل کرلیا۔2017ءمیں انٹرنیشنل کرکٹ سے ریٹائر ہونے والے 44سالہ سابق کپتان گزشتہ سیزن میں اسلام آباد کی جانب سے کھیلتے ہوئے اچھی فارم میں نظر نہیں آئے تھے،ویسٹ انڈین آل راؤنڈر ڈیرن سیمی کی موجودگی میں پشاور زلمی کے پاس قیادت کا فقدان بھی نہیں تھا تاہم اس کے باوجود مصباح الحق کو منتخب کیا گیا۔دوسری جانب ٹی ٹونٹی فارمیٹ کا تقاضا ہونے کے باوجود کئی نوجوان کرکٹرز کو کسی ٹیم نے بھی منتخب نہیں کیا،سابق ون ڈے کپتان اظہر علی اور اسد شفیق جیسے سینئرزکو نظر انداز کردیا گیا، آل راؤنڈر عبدالرزاق نے کم بیک کے لیے رواں سال پی ٹی وی کی جانب سے ڈومیسٹک ون ڈے ٹورنامنٹ بھی کھیلا،ان سمیت ٹیسٹ کرکٹر عمران نذیر کی بھی پی ایس ایل کھیلنے کی خواہش پوری نہیں ہوسکی۔ماضی میں عالمی ٹی ٹونٹی رینکنگ میں سر فہرست رہنے والے فاسٹ باؤلر عمرگل، 2010 ءکے سپاٹ فکسنگ سکینڈل میں سزا پانے والے سابق کپتان سلمان بٹ اور فاسٹ باؤلر محمد آصف بھی کسی پی ایس ایل ٹیم میں جگہ نہیں بنا سکے،ٹیسٹ
کرکٹر فواد عالم کو بھی کسی نے منتخب نہ کیا۔کوئٹہ گلیڈی ایٹرز نے عمراکمل کو منتخب کیا اورساتھ احمد شہزاد کو بھی سپلیمنٹری کیٹیگری میں لے لیا،ٹیسٹ اوپنر کو بوقت ضرورت ہی ٹیم میں طلب کیا جائے گا۔
