، ”جب اس وڈیرے نے میری بہن اور چچا کو مارا تو میں شوٹنگ پر تھی جلدی سے گھر پہنچی تو دیکھا کہ۔۔۔“

اداکارہ کومل عزیز کا کہنا ہے کہ جب ان کے مالک مکان نے ان کے چچا اور بہن پر تشدد کیا تو وہ اس وقت قریب ہی شوٹنگ کر رہی تھیں اور جب انہیں اس واقعے کا پتہ چلا تو وہ چند منٹوں میں ہی اپنے ساتھیوں کے ہمراہ وہاں پہنچیں لیکن ان کے پہنچنے سے پہلے مالک مکان موقع سے فرار ہو چکا تھا۔
اداکارہ کومل عزیز نے اپنی چھوٹی بہن کے ہمراہ نجی ٹی وی اے آروائی نیوز کے مارننگ شو میں شرکت کی اور خود پر ہونے والے ظلم کی داستان سنائی ۔ انہوں نے کہا کہ شوٹنگ کے دوران ان کا دل بہت زیادہ گھبرا رہا تھا ’ میں نے کھانے کیلئے کچھ منگوایا اور جب کھانا نہیں آیا تو میں نے کہہ دیا کہ کل سے شوٹنگ پر نہیں آﺅں گی جس پر ڈائریکٹر نے کہا کہ حوصلہ رکھو‘۔

کومل عزیز نے کہا کہ تھوڑی ہی دیر میں ان کی بہن کا فون آگیا اور اس نے بتایا کہ مالک مکان ہمیں مار رہا ہے جلدی سے آﺅ اور اپنے ساتھ بندے لے کر آنا ۔ ’بہن کا فون سنتے ہی میں رونے لگی اور اپنی ٹیم کے ہمراہ فوری طور پر گھر پہنچی تو دیکھا کہ ہر طرف خون ہی خون ہے‘۔

اداکارہ نے بتایا کہ انہیں اپنے والد کے انتقال کی خبر بھی ٹیلی فون کال پرہی ملی تھی اور جب بہن کا فون آیا تو وہ بہت پریشان ہوگئیں اور یہ سوچنے لگیں کہ انہیں کچھ ہو نہ جائے۔ ’ ایسے مشکل حالات میں جب کوئی بھی ہمارا ساتھ نہیں دے رہا تھا تو ہمارے ساتھ جو بندہ کھڑا ہوا اسے ہی نقصان پہنچا، میں نے پہلے خود ہی اس کے ساتھ صلح کرلی تھی لیکن تشدد کے بعد میں نے کہا کہ اب جان پر بات آگئی ہے اب اس کو نہیں چھوڑنا‘۔

واضح رہے کہ کچھ روز قبل اداکارہ کومل عزیز نے الزام عائد کیا تھا کہ ان کے مالک مکان نے ان کے اہلخانہ پر تشدد کیا ہے اور گھر خالی کرنے کے باوجود پیچھا نہیں چھوڑ رہا ہے۔

ویڈیو دیکھیں