دبئی (ویب ڈیسک) پاکستان کرکٹ ٹیم کے ہیڈ کوچ مکی آرتھر کا کہنا ہے کہ بطور ٹیسٹ کپتان سرفراز احمد شاندار انداز میں کارکردگی کا مظاہرہ کر رہے ہیں، ہمیں یہ مان لینا چاہئے کہ سرفراز احمد ایک وکٹ کیپر ہیں اور یہی اصل میں ان کا کام ہے اور جب بیٹنگ میں ہمیں ان کی ضرورت پڑی تو انہوں نے کارکردگی دکھائی۔دبئی ٹیسٹ میں نیوزی لینڈ کی شکست کے
بعد صحافیوں سے گفتگو کرتے ہوئے مکی آرتھر نے کہا کہ یہ مان لینا چاہیے کہ سرفراز ایک وکٹ کیپر ہیں اور یہی اصل میں ان کا کام ہے، بیٹنگ میں ہمیں جب ان کی ضرورت پڑی انہوں نے پرفارم کیا، آسڑیلیا کے خلاف ابوظہبی ٹیسٹ اس کی ایک بڑی مثال ہے۔انہوں نے کہا کہ حیرانی اس وقت ہوتی ہے جب ان کی ٹیسٹ قیادت پر پاکستان میں سابق کرکٹرز تحفظات کا اظہار کرتے ہیں۔دبئی ٹیسٹ کی جیت پر مکی آرتھر کا کہنا تھا کہ وہ بہت خوش ہیں اور اس بات کا افسوس بھی ہے کہ ابوظہبی میں جیتا ہوا میچ ہار گئے جبکہ ڈریسنگ روم میں سب اچھا چل رہا ہے۔مجھے حیرت ہوتی ہے جب لوگ میرے اور کپتان سرفراز احمد کے اختلافات کو لے کر بات کرتے ہیں۔
