لندن(ویب ڈیسک) شادی کی بات آئے تو اس حوالے سے مغربی دنیا سے گاہے عجیب و غریب خبریں سننے کو ملتی ہیں جہاں مردوخواتین ایسی ایسی چیزوں سے شادی کرلیتے ہیں کہ سن کر حیرت کی انتہاءنہ رہے۔ اب برطانیہ سے بھی ایسی ہی ایک خبر آ گئی ہے جہاں ایک خاتون نےاپنی رضائی کے ساتھ شادی کر لی ہے۔ دی میٹرو کے مطابق اس 49سالہ خاتون کا
نام پیسکیل سیلیک ہے جو برطانوی شہر ایکسیٹر کی رہائشی ہے۔ اس کا کہنا ہے کہ رضائی میری بہترین ساتھی ہے۔ اس نے میرا جتنا ساتھ نبھایا ہے کوئی مرد آج تک نہیں نبھا سکا۔ چنانچہ اب میری زندگی میں مردوں کا وقت ختم ہو گیا کیونکہ میں نے اپنی رضائی سے ہی شادی کر لی ہے۔ رپورٹ کے مطابق پیسکیل کی یہ شادی محض باتوں کی حد تک ہی نہیں بلکہ اس نے اس کے لیے باقاعدہ تقریب کا انعقاد کیا جس میں اس کے قریبی دوستوں اور رشتہ داروں نے شرکت کی۔ تقریب میں موسیقی اور مہمانوں کے لیے کھانے کے اہتمام بھی کیا گیا تھا۔ شادی کے بعد پیسکیل کا کہنا تھا کہ ”میں جب بھی گھر آتی ہوں میری رضائی میری راہ دیکھ رہی ہوتی ہے۔ جونہی میں آتی ہوں یہ مجھے گلے لگا لیتی ہے۔ میں اس سے بہت محبت کرتی ہوں اور مجھے اس سے بہتر کوئی جیون ساتھی نہیں مل سکتا۔“
